کوئٹہ: مسلح افراد کی فائرنگ سے دو پولیس اہلکار ہلاک

کوئٹہ: مسلح افراد کی فائرنگ سے دو پولیس اہلکار ہلاک

کوئٹہ: کوئٹہ کے علاقے سمنگلی روڈ پر نامعلوم افراد نے ڈپٹی سپرنٹنڈنٹ پولیس (ڈی ایس پی) حمید اللہ کی گاڑی پر فائرنگ کردی جس کے نتیجے میں اسکواڈ میں شامل دو پولیس اہلکار موقع پرہلاک ہوگئے۔
پولیس حکام کے مطابق حملے میں ڈی ایس پی حمید اللہ محفو ظ رہے تاہم علاقے کو سیکیورٹی فورسز نے گھیرے میں لے کر تفتیش شروع کردی ہے۔
ہلاک ہونے والے اہلکاروں کی شناخت محمد طاہر اور ایوب کے نام سے ہوئی ہے۔
پولیس نے بتایا کہ کوئٹہ کے نواحی علاقے سمنگلی روڈ پر نامعلوم افراد نے گھات لگا کر ڈی ایس پی حمید اللہ کے اسکواڈ پر حملہ کیا۔
ان کے مطابق ڈی ایس اپی حمید اللہ گھر سے اپنے دفتر جارہے تھے کہ مسلح افراد نے ان کی گاڑی پر اندھا دھند فائرنگ کردی۔
مذکورہ واقعے کی ذمہ داری تاحال کسی نے قبول نہیں کی۔
واضح رہے کہ گزشتہ چند مہینوں سے پولیس اہلکاروں کو نشانہ بنایا جارہا ہے، پولیس ذرائع نے ڈی ایس پی حمید اللہ پر حملے کو بھی ٹارگیٹ کلنگ کا واقعہ قرار دیا ہے۔
اس سے قبل کوئٹہ میں گزشتہ ماہ زرغون روڈ پر خودکش حملے کے نتیجے میں 5 پولیس اہلکاروں سمیت 7 افراد ہلاک جبکہ اہلکاروں سمیت 18 افراد زخمی ہوگئے تھے۔
14 فروری کو کوئٹہ میں نامعلوم مسلح افراد کی سیکیورٹی فورسز کی گاڑی پر فائرنگ سے 4 اہلکارہلاک ہوگئے تھے۔